Page:Madeleine de Scudéry - Clélie, histoire romaine - Volume 02.pdf/384

ges, & des Eſchaffauts au Cirque, qui furent d’vne deſpenſe extraordinaire. Il eſtablit meſme deux nouuelles Colonies : mais en faiſant toutes ces choſes, il en faiſoit touſiours d’iniuſtes & de cruelles. Il fit mourir le Fils aiſné d’vne Sœur qu’il auoit : il ne maria meſme ſa Fille que pour en faire vne action de perfidie : & il n’oublia rien de tout ce qui luy pouuoit faire meriter le nom de Tyran. Cependant Tullie au milieu de ſa grandeur, n’a iamais eſté tout à fait contente depuis qu’elle eſt ſur le Throſne : car elle a touſiours eu vne ialouſie d’authorité, qui luy a fait croire que Tarquin ne luy en donnoit pas aſſez : & qu’ayant encore eu plus d’inhumanité que luy pour Tullus, elle deuoit du moins partager toute ſa puiſſance. De ſorte que quoy que le Temps ait affoibly dans ſon cœur l’amour qu’elle a eu