Page:Madeleine de Scudéry - Clélie, histoire romaine - Volume 02.pdf/378

cela Seigneur, mon Pere s’affoibliſſant tout d’vn coup, ne pût luy en dire dauantage, car il mourut le meſme ſoir. Cependant comme Siuelia voulut obeïr auſſi exactement à ſon Mary mort, qu’elle luy auoit obeï quand il eſtoit viuant ; elle agit auec tant de prudence, & tant d’adreſſe, que par les Parens & les Amis qu’elle auoit à Rome, elle eut la permiſſion d’y retourner, & d’y mener ſes Enfans, ſans que Tarquin luy meſme creûſt qu’elle l’euſt ſouhaité, ny qu’elle deuſt luy en auoir obligation. Elle eut meſme la fermeté, apres qu’elle fut retournée à Rome, de n’aller iamais voir la Cruelle Tullie : & elle m’a touſiours inſpiré des ſentimens ſi droits, & ſi genereux, que ie ſerois le plus ingrat de tous les hommes, ſi ie ne le publiois pas. En effet ie me ſouuiens d’vn iour qu’elle ſçeut qu’on me ſolicitoit d’eſtre d’vne Con-