Page:Madeleine de Scudéry - Clélie, histoire romaine - Volume 02.pdf/377

du vice. Mais Seigneur, reprit-elle, pour retourner à Rome il faut reconnaiſtre Tarquin, il luy faut obeïr, & il faut luy demander comme vne grace la permiſſion d’y rentrer. Penſez donc bien ie vous en coniure, ſi l’honneur me permet de faire ce que vous ſouhaitez que ie face : & s’il ne vaudroit point mieux mourir hors de Rome, que d’y rentrer par vne ſemblable voye ? Quoy qu’il en ſoit, dit mon Pere, ie veux que mes Enfans ſoient eleuez dans Rome, afin qu’ils puiſſent vn iour nuire à celuy qui en eſt le Tyran : & que ie meure auec la conſolation de pouuoir eſperer d’auoir laiſſé des Enfans qui contribuëront peut-eſtre vn iour quelque choſe à la liberté de ma Patrie. Pour les voyes de les y remener, luy dit-il, ie les laiſſe à voſtre prudence : car auſſi bien ne puis-ie pas deuiner ce qui vous arriuera quand ie ne ſeray plus. Apres