Page:Madeleine de Scudéry - Clélie, histoire romaine - Volume 02.pdf/376

quelle education vous voulez que ie donne à vos Enfans ? (adiouſta-t’elle en me montrant auec deux autres qu’elle auoit alors) car comme ils ſont fort ieunes, il me ſera peut-eſtre aiſé de leur inſpirer les ſentimens que vous voulez qu’il ayent. Aprenez moy donc de grace, en quel lieu de la Terre vous voulez que ie viue ; iuſques à ce que ie les aye mis en eſtat de pouuoir ſuiure le chemin de la vertu que ie leur auray enſeigné ? Ie veux, luy repliqua mon Pere, que vous taſchiez de retourner au lieu d’où l’on nous a bannis : afin que mes Enfans s’affectionnent à leur Patrie, & ne prennent point de moeurs eſtrangeres qui les empeſchent de haïr le Tyran de Rome. Mais ie veux en meſme temps que vous emploiyez toute l’adreſſe dont vous eſtes capable, pour entretenir dans leur cœur l’amour de la vertu, & la haine