Page:Madeleine de Scudéry - Clélie, histoire romaine - Volume 02.pdf/374

qui ſuiuent d’ordinaire tous les Exilez. Car outre que Siuelia a vn eſprit d’vne grande eſtenduë, & qu’elle l’a ferme & genereux ; elle eſt tellement perſuadée qu’il faut faire ſon deuoir preferablement à toutes choſes, qu’elle ne trouue iamais de difficulté à executer ce qu’elle croit eſtre obligée de faire, principalement quand c’eſt vn deuoir que l’amitié luy impoſe. Elle a meſme vne amitié ſi deſintereſſée, qu’elle ne conſidere iamais que les Perſonnes qu’elle eſtime, ſans ſe conſiderer elle meſme : & s’il eſt plus auantageux à ceux pour qui elle a de la tendreſſe qu’ils ſoient eſloignez d’elle, que d’en eſtre proche, elle y conſent genereuſement : & cache meſme la douleur qu’elle en a pour n’en donner pas à ceux pour qui elle a vne amitié ſi obligeante. De ſorte que ioignant enſemble vne grande beauté, vn grand eſprit, & vne