qui venoit d’arriuer ; leur montrant meſme la Lettre du Prince de Numidie : exagerant fort en ſuite, le pouuoir qu’Aronce auoit eu ſur luy meſme, de ne vouloir pas ouurir celle que ſon Riual eſcriuoit à Clelie, quoy qu’il en euſt vne enuie eſtrange. Si ie pouuois eſtimer dauantage Aronce que ie ne l’eſtime, repliqua la Princeſſe des Leontins, ie le ferois ſans doute : car ie ne trouue rien de ſi loüable que la fidelité, principalement quand on la garde en certaines choſes où il eſt aiſé d’eſtre infidelle ; où il eſt agreable de l’eſtre ; & où l’on pourroit meſme trouuer des excuſes, & beaucoup d’exemples pour authoriſer l’infidelité. Car combien y a-t’il de perſonnes qui ne font ſcrupule aucun d’ouurir toutes les Lettres qui paſſent par leur mains, & qui aportent vn ſoin extréme à ſçauoir les ouurir & les refermer ſans
Page:Madeleine de Scudéry - Clélie, histoire romaine - Volume 02.pdf/37
Le texte de cette page a été corrigé et est conforme au fac-similé.
