Page:Madeleine de Scudéry - Clélie, histoire romaine - Volume 02.pdf/369

pas pluſtoſt dans le Throſne, qu’ils ſe repentirent de l’y auoir mis : & qu’ils connurent qu’au lieu d’auoir vn Roy, ils alloient auoir vn Tyran. Car dés que Tarquin fut Maiſtre de Rome, il ſongea d’abord à flatter le Peuple : afin de ſe mettre en pouuoir d’abaiſſer l’authorité du Senat. Pour cét effet il prit la reſolution de ne l’augmenter iamais : il ſe rendit Maiſtre de tous les lieux forts de la Ville : & il eut touſiours vne Garde tres forte à ſon Palais. Apres quoy ne ſongeant qu’à regner par la crainte, il fit mourir vn nombre tres grand des plus illuſtres Senateurs : il en exila beaucoup : & il ſe rendit ſi redoutable, que perſonne ne ſe vit en pouuoir de s’oppoſer à ſes volontez. En effet il ne ſe contenta pas de perdre ou d’exiler ceux qui luy pouuoient nuire : mais il ſuppoſa des crimes à diuers Citoyens pour s’enrichir