Page:Madeleine de Scudéry - Clélie, histoire romaine - Volume 02.pdf/368

heureux Roy, fut de nuit (accompagnée de ma Mere qui fut la ſeule Femme qui ne l’abandonna point en cette funeſte rencontre) où eſtoit le Corps de ce Prince : & qu’eſtant aſſiſtée de quelques anciens Domeſtiques, elle le fit porter comme celuy du moindre de ſes ſuiets iuſques à ſon Palais : ce que le cruel Tarquin & la fiere Tullie ayant ſçeu, ils l’enuoyerent eſtrangler : du moins eſt-il certain que cette déplorable Princeſſe ayant enuoyé ma Mere donner quelques ordres pour les Funerailles ſecretes du Roy ſon Mary, elle la trouua morte à ſon retour, ſans en pouuoir rien deſcouurir dauantage : car le Palais du Roy deuint vn effroyable Deſert dés qu’il euſt eſté aſſaſſiné. Cependant tout le monde eſtoit en vne conſternation horrible dans Rome : car la plus grande partie de ceux qui auoient ſeruy Tarquin, ne le virent