Page:Madeleine de Scudéry - Clélie, histoire romaine - Volume 02.pdf/365

uaux, par vn ſentiment de reſpect & d’humanité tout enſemble : & ſe tournant vers la cruelle Princeſſe qu’il conduiſoit, il luy montra le Corps du Roy ſon Pere, comme luy voulant montrer ce qui l’auoit obligé de s’arreſter. Et en effet cét homme ſe voulut mettre en deuoir de reculer, & de tourner par vne autre Ruë : mais l’impitoyable Tullie, inſpirée par la cruauté meſme, ſe moqua de ſon reſpect : & prenant la parole auec vne inhumanité inconceuable ; paſſe, luy cria-t’elle auec colere, paſſe ſans t’arreſter : car il n’eſt point de chemin qui ne ſoit beau pour monter au Throſne. De ſorte que celuy qui conduiſoit ce Chariot n’oſant luy reſiſter, laſcha la Bride à ſes Cheuaux : qui moins impitoyables que la cruelle Tullie, s’empeſcherent autant qu’ils purent, par vn ſentiment que la ſeule horreur d’vn Corps mort