Page:Madeleine de Scudéry - Clélie, histoire romaine - Volume 02.pdf/363

ſon Palais : car en l’eſtat où il eſtoit, il ne pouuoit faire autre choſe, parce qu’il eſtoit preſques ſeul : & que le Roy ne pouuoit marcher qu’auec beaucoup de difficulté. Mais helas à peine fut-il arriué au haut d’vne Ruë Cyprienne (& que le Peuple a touſiours depuis nommée la Ruë Deteſtable, malgré toute la Tyrannie de Tarquin) que ce malheureux Roy fut arraché d’entre les bras de mon Pere qui le deffendit autant qu’il pût : de ſorte qu’il fut aſſaſſiné vn moment apres par ceux que le cruel Tarquin enuoya pour cela. Ainſi mon Pere apres auoir eſſayé vainement d’exciter le Peuple à vanger la mort de ſon Roy, fut contraint de ſe retirer chez luy. Cependant la fiere Tullie, qui auoit donné ordre qu’on l’auertiſt de moment en moment de tout ce qui ſe paſſeroit, ne ſçeut pas pluſtoſt ce que