Page:Madeleine de Scudéry - Clélie, histoire romaine - Volume 02.pdf/360

mier Tarquin : il traitta touſiours Seruius d’Eſclaue : & il parla auec vne eloquence fiere & hardie, comme ſi Tullus euſt eſté le Tyran, & qu’il euſt eſté le Roy legitime. Si bien que s’eſleuant vn grand bruit d’acclamation de ceux qui eſtoient payez pour cela ; & ſe faiſant auſſi vn grand murmure de ceux qui n’aprouuoient pas ce qu’il faiſoit ; on entendit vne telle confuſion de voix, que l’on n’entendit plus Tarquin. Comme les choſes eſtoient en cét eſtat, Tullus qui auoit eſté aduerty de ce deſordre, vint en ce lieu là pour taſcher de mourir du moins dans le Throſne qu’il auoit ſi dignement occupé. Mais dés que ce venerable Roy fut à quatre pas de Tarquin, il regarda ce fier Vſurpateur qui auoit inſolemment pris ſa place : & prenant la parole ; quelle audace eſt la tienne Tarquin, luy dit-il, d’aſſembler le