Page:Madeleine de Scudéry - Clélie, histoire romaine - Volume 02.pdf/356

en Ruë, & de Maiſon en Maiſon, pour s’aſſurer de tous ceux de ſa Faction. Mais à peine y fut-il, que cette deteſtable Princeſſe, qui ſçauoit tout ce qu’il premeditoit de faire, fut au deuant de luy auec la ioye dans les yeux : & prenant la parole la premiere : courage Tarquin, luy dit-elle, vous n’auez preſques plus qu’vn pas à faire pour monter au Throſne, faites-le donc hardiment : & rendez vous digne d’eſtre Mary de Tullie, par vne action heroïque. Laiſſez en cette occaſion la tendreſſe & la pitié aux Perſonnes vulguaires : & ſçachez que ie vous permets de ſacrifier toutes choſes à voſtre ambition, ſans en excepter meſme le Roy. Partez donc auec vne reſolution ineſbranlable de monter auiourd’huy au Throſne, ou de deſcendre au Tombeau : car il ne doit point y auoir de milieu entre ces deux choſes, aux termes où vous en eſtes. Non non gene-