Page:Madeleine de Scudéry - Clélie, histoire romaine - Volume 02.pdf/355

toute entiere ſans y entendre dire douze paroles haut : car tous ceux qui y alloient auoient quelque choſe à dire bas à Tullie ; ou Tullie à eux ; ou eux à ceux qu’ils y trouuoient : ſi bien qu’il n’y auoit rien de plus incommode que de ſe rencontrer parmy tant de Gens qui auoient des affaires, principalement lors qu’on n’en auoit point. Mais enfin le point fatal deſtiné à la perte de Seruius Tullus, & à la Grandeur de Tarquin eſtant arriué, Rome vit la plus effroyable auanture, qu’on ait iamais veuë en nul lieu du Monde. Vous ſçaurez donc que cét ambitieux Prince ayant diſpoſé toutes choſes pour l’execution de ſon barbare deſſein, & s’eſtant reſolu d’eſtre Roy ou de mourir, fut le matin de ce funeſte iour à la Chambre de la fiere Tullie : car il auoit paſſé toute la nuit à aller deſguiſé de Ruë,