Page:Madeleine de Scudéry - Clélie, histoire romaine - Volume 02.pdf/354

preciſément à qui il ſe deuroit adreſſer, quand il voudroit s’enrichir de la deſpoüille de ſes ſuiets. De ſorte que prenant chacun dans ſon intereſt, & ſemant tous ces diuers bruits auec adreſſe, inſenſiblement la multitude (qui n’eſt iamais capable d’vn iuſte diſcernement, & qui eſt touſiours toute diſpoſée à murmurer contre les Puiſſances, & principalement contre vn vieux Roy) ſe laiſſa inſenſiblement perſuader que le plus iuſte Prince du Monde auoit tort en pluſieurs choſes. De ſorte que Tarquin & Tullie, voyant vn ſi heureux acheminement à leur entrepriſe, auoient vne ioye extréme : c’eſtoit pourtant vne ioye qui ne ſe communiquoit point aux autres : car les conuerſations de chez Tullie n’auoient rien qui ne ſuſt tres ennuyeux à ceux qui n’eſtoient pas de ſon intrigue. En effet i’ay oüy aſſurer qu’on y paſſoit quelqueſfois vne Apreſdiſnée