Page:Madeleine de Scudéry - Clélie, histoire romaine - Volume 02.pdf/353

qu’il voulut contre le Roy. Les vns diſoient donc qu’il n’eſtoit qu’vn Eſclaue nay d’vne Eſclaue, & qui apres la mort du premier Tarquin auoit vſurpé la Couronne par les artifices d’vne Femme qui l’auoit fait Roy ſans le ſuffrage du Peuple. Les autres diſoient aux Senateurs, que Seruius par vn ſentiment qui ſentoit la baſſeſſe de ſa naiſſance, auoit oſté le Bien à toutes les riches Familles, pour le partager entre les Pauures : quelques autres diſoient aux Peuples, que le Roy leur auoit oſté la nomination des principales Charges, pour les donner toutes aux Puiſſans, afin qu’ils opprimaſſent les foibles : & d’autres diſoient encore que ce Prince qui auoit fait faire le dénombrement de tous les Biens des particuliers, ne l’auoit fait qu’afin de faire naiſtre l’enuie dans le cœur des pauures contre les riches, & qu’afin de ſçauoir