Page:Madeleine de Scudéry - Clélie, histoire romaine - Volume 02.pdf/352

de murmurer contre Seruius Tullus : mais en meſme temps qu’il commença de ſe pleindre ; ceux qui auoient eſté ſubornez par luy, ou par Tullie, commencerent auſſi de deſcrier le Gouuernement, & de dire mille choſes contre le meilleur Roy du Monde. Et ce qu’il y a encore de remarquable, c’eſt que Seruius Tullus qui a eſté le premier de nos Rois qui a fait battre de la Monnoye, & qui en a introduit l’vſage parmy nous, facilita par ce moyen les voyes de ſuborner ceux dont Tarquin auoit beſoin : car par là il eſtoit plus aiſé de le faire ſans bruit & ſans qu’on s’en aperçeuſt, qu’il ne l’euſt eſté auparauant. Auſſi auoit-il vn ſi grand nombre de gens à luy, qu’il n’y auoit de nulle ſorte d’Artiſans dont il n’y en euſt quelques-vns tous preſts à faire ce qu’il voudroit : il auoit meſme vne brigue parmi les Eſclaues : ainſi il luy fut aiſé de ſemer tels bruits