Page:Madeleine de Scudéry - Clélie, histoire romaine - Volume 02.pdf/350

aller chez quelques vns des Senateurs qui eſtoient de ſon intelligence : pendant quoy on diſoit le ſoir qu’il eſtoit au Bain, & on croyoit le reſte de la nuit qu’il dormoit. Il entreprit meſme d’employer les choſes les plus ſaintes à faire reüſſir ſes deſſeins : car il gagna quelques-vns des Preſtres Saliens : & il fit propoſer indirectement à la Grande Veſtale d’entrer dans ſes intereſts, mais elle ne le voulut pas : quoy qu’il luy promiſt de la garantir de toute ſorte de peril. Cependant l’opinion commune eſt qu’il vouloit qu’elle laiſſaſt volontairement eſteindre le Feu Sacré; afin de dire apres cela que Rome eſtoit menacée d’vn grand malheur, & que cét accident vouloit dire que l’authorité eſtoit foible entre les mains d’vn Prince auſſi vieux que Seruius Tullus : car comme il connoiſſoit bien le naturel du