Page:Madeleine de Scudéry - Clélie, histoire romaine - Volume 02.pdf/349

car il n’y auoit point de iour que Tarquin ou Tullie n’obtinſſent quelque choſe de luy, pour eux qu’ils engageoient dans leurs intereſts. Cependant Tarquin menoit alors vne vie la plus penible du monde, car il n’auoit repos ny nuit ny iour : en effet il auoit touſiours cent choſes differentes à faire, qui tendoient toutes à meſme fin : car comme il vouloit engager toutes ſortes de conditions dans ſon Party, il auoit des intelligences de toutes manieres. Il y auoit donc des gens qui ſur le preſtexte de la Table qu’il tenoit alloient conferer aueque luy : il y en auoit d’autres qu’il ne voyoit qu’aux Temples : il y en auoit qu’il cherchoit chez eux : & il y en auoit qu’il voyoit meſme chez le Roy, quoy qu’il ne traiſtaſt auec eux que pour le detruire. De plus, il ne ſe paſſoit preſques pas vne nuit qu’il ne ſortiſt deſguiſé de chez luy pour