Page:Madeleine de Scudéry - Clélie, histoire romaine - Volume 02.pdf/346

ſur le Throſne. Cependant ſi vous continuez d’auoir vne prudence ſi nuiſible, ie ne ſçay pas à quoy bon de faire tout ce que vous auez fait : & de faire encore tout ce que vous faites. En effet, à quoy vous ſert cette ciuilité extraordinaire que vous auez pour le Peuple le plus bas & le plus abiect ? à quoy bon cette laſche complaiſance pour tous les Patriciens ? à quoy bon de preſter de l’argent aux vns, d’en donner aux autres, & d’eſtre prodigue inutilement ? & à quoy bon enfin d’eſtre ambitieux, & d’auoir vne paſſion tumultueuſe & chagrine dans le cœur, pour ne s’en ſeruir à rien ? Croyez moy Tarquin, ſi vous ne voulez pas vous haſter dauantage, ie vous conſeille de vous en retourner ou à Tarquinie, ou à Corinthe : & de chercher la felicité par vne autre voye que par l’ambition : car peut-eſtre la trouuerez vous dans