Page:Madeleine de Scudéry - Clélie, histoire romaine - Volume 02.pdf/342

de ſorte qu’en entrant en vne fureur eſtrange, il en reiaillit quelque choſe ſur ſon Mary : qui n’agiſſoit pas encore aſſez ſelon ſon intention pour la faire paruenir promptement où elle auoit enuie d’aller. Si bien que ne pouuant plus diſſimuler ce qu’elle auoit dans le cœur, elle commença de ne regarder plus Tarquin qu’auec vne fierté extraordinaire : & comme ce Prince qui de ſon naturel eſt tres ſenſible, luy demanda d’où venoit le changement de ſon humeur ? il vient, luy reſpondit-elle, de ce que vous ne changez point de place, & de ce que vous vous mettez en eſtat de n’en changer iamais ; car enfin Tarquin, pour ne vous diſſimuler rien, ie n’ay pas conſenty à la mort de ma Sœur, & ie n’ay pas empoiſonné mon Mary pour eſtre Femme d’vn ſimple Citoyen Romain : car la Fille de Tullus n’auoit que faire d’employer des