Page:Madeleine de Scudéry - Clélie, histoire romaine - Volume 02.pdf/341

vouloit qu’il reüſſiſt. Elle euſt bien voulu que le Roy ſon Pere ſe fuſt démis du Gouuernement entre les mains de Tarquin : mais elle ſçauoit au contraire que ce vertueux Roy ne ſouhaitoit pas qu’il regnaſt : & que s’il auoit à ſe démettre de la puiſſance Royale, comme il en couroit alors quelque bruit, ce ſeroit à condition qu’il n’auroit point de ſucceſſeur : car il iugeoit bien, veû les brigues que faiſoit Tarquin, que s’il en auoit il ſeroit Roy. Si bien que ne luy voyant pas les vertus neceſſaires à vn bon Prince, il gardoit la puiſſance Royale entre ſes mains, & en vſoit auec vne moderation digne de ſeruir de Modele à tous les Rois de la Terre. Mais comme il eſt extrémement difficile aux Rois de cacher leurs ſentimens, Tullie deſcouurit bien toſt que le Roy ſon Pere ne ſongeoit pas à luy mettre la Couronne ſur la teſte,