Page:Madeleine de Scudéry - Clélie, histoire romaine - Volume 02.pdf/337

dition & du merite. Mais pour moy qui ne ſçaurois auoir qu’vn reſpect apparent, pour les Perſonnes de qualité qui n’ont point de vertu, & qui affectent d’eſtre inciuiles, ie ne les voy plus dés qu’elles ne me reçoiuent pas comme ie penſe qu’elles ſont obligées de le faire : & voicy enfin quelle eſt ma façon d’agir. Quand ie me trouue auec des gens qui ſont moins que ie ne ſuis, ie ſonge autant que ie le puis à leur faire beaucoup de ciuilité : quand ie vay voir de mes Amies de condition égalle à la mienne, ie ne garde point de meſure auec elles : & ie ne me ſoucie pas qu’elles en gardent aueque moy, pourueû qu’il n’y ait point de perſonnes eſtrangeres : quoy que ie ſois perſuadée que la familiarité & l’amitié, ne doiuent iamais bannir la ciuilité. Mais quand ie vay chez ces Femmes que la Fortune a miſes beaucoup