Page:Madeleine de Scudéry - Clélie, histoire romaine - Volume 02.pdf/334

pliqua ſon Amie, que vous n’en deuez pas eſtre ſurpriſe : & ie ſuis ſi peu accouſtumée à ſouffrir l’inciuilité, reprit cette Dame irritée, que ie ne la ſçaurois endurer. Mais adiouſta celle à qui elle ſe pleignoit, connoiſſez vous vne Femme dans Rome qui ſoit de condition à voir Tullie, qui n’ait pas ſouffert quelque choſe d’elle ? & penſez vous qu’il vous ſoit honteux d’endurer ce que toutes les autres endurent ? Ie penſe (repliqua-t’elle alors à demy en colere) que celles qui l’endurent ont le cœur fort bas, & que ie ne l’ay pas tel. Veritablement ſi ie ne pouuois viure ſans aller chez Tullie ; que ie fuſſe née ſon Eſclaue ; ou que du moins ma fortune en deſpendiſt ; & que ie fuſſe aſſurée que quand i’aurois bien fait des baſſeſſes, & bien enduré des inciuilitez, elle feroit quelque choſe de grand pour moy, on pourroit peut-eſtre dire