Page:Madeleine de Scudéry - Clélie, histoire romaine - Volume 02.pdf/333

tée que parce qu’elle ſe faiſoit craindre. Et certes ce n’eſtoit pas ſans raiſon ſi on la craignoit : car elle faiſoit des choſes ſi violentes, qu’elle eſtoit redoutable à tout le monde : en effet il arriua vne fois qu’elle fit vne inciuilité horrible à la Femme d’vn de nos premiers Senateurs, qui ayant le cœur haut & ſenſible, ne pût s’empeſcher de s’en pleindre en vn lieu où elle fut au ſortir de chez cette Princeſſe. Car comme elle y trouua vne de ſes Amies particulieres, elle ne la vit pas pluſtoſt que prenant la parole ; de grace, luy dit-elle auec aſſez d’eſmotion, réiouïſſez vous aueque moy de ce que ie ſuis deliurée pour toute ma vie de la plus importune viſite du monde : car enfin ie n’iray iamais chez Tullie, quand meſme elle deuiendroit Reine. Elle eſt ſi accouſtumée d’eſtre inciuile, re-