Page:Madeleine de Scudéry - Clélie, histoire romaine - Volume 02.pdf/331

luptueux auec ceux qui l’eſtoient : & il faiſoit auſſi le Philoſophe quand il ſe rencontroit auec des Gens qui faiſoient profeſſion de l’eſtre. Cependant i’ay oüi dire que quoy qu’il priſt cent formes differentes, il eſtoit toûiours Tarquin : & que lors qu’il vouloit eſtre le plus doux, & le plus ciuil, il y auoit pourtant touſiours ſur ſon viſage & dans ſes yeux, quelque choſe de ſombre, de fier, & de meſchant. Mais apres tout, comme le Peuple regarda plus ſes ciuilitez & ſes bienfaits, que ſa phiſionomie, il s’y laiſſa tromper : & l’execrable Tarquin aquit inſenſiblement vn fort grand credit ſous le regne d’vn des plus vertueux Rois de la Terre. Pour Tullie il n’en fut pas de meſme : car elle n’auoit pas l’eſprit capable de ſe changer en cent façons differentes comme Tarquin. Au contraire elle s’eſtoit tellement mis dans la teſte, qu’elle eſtoit au