Page:Madeleine de Scudéry - Clélie, histoire romaine - Volume 02.pdf/330

remarquer ſa ciuilité à ceux dont il attendoit vn iour vne Couronne. De plus, il s’intereſſoit auec empreſſement dans les affaires des particuliers ; il accommodoit des querelles ; il terminoit des differens d’intereſt ; il diuiſoit ceux qui luy pouuoient nuire ; il reüniſſoit ceux qui luy pouuoient ſeruir ; il preſtoit de l’argent aux vns ; il en donnoit aux autres ; la Porte de ſon Palais eſtoit ouuerte à tout le monde ; & il ſe piquoit de ſeruir ceux qu’il nommoit ſes Amis, auec vne ardeur extraordinaire. Au reſte il s’accommodoit admirablement à l’humeur de tous ceux qui le voyoient, quand il eſtoit en particulier : car il paroiſſoit eſtre religieux iuſques au ſcrupule, auec ceux qui auoient de la Religion : il eſtoit libertin auec les libertins : & il ſe moquoit eſgallement & des Dieux des Grecs, & des Dieux des Romains. Il eſtoit meſme vo-