Page:Madeleine de Scudéry - Clélie, histoire romaine - Volume 02.pdf/328

lie, ſans que Tullus le pûſt empeſcher. Ce n’eſt pas que ce Mariage ne luy fiſt horreur, & ne luy paruſt execrable, toutes les fois qu’il conſideroit que Tarquin auoit empoiſonné ſa Femme pour eſpouſer Tullie, & que Tullie auoit empoiſonné ſon Mary pour eſpouſer Tarquin ; mais ayant commencé de diſſimuler leur crime, il falut qu’il continuaſt de le faire. Ioint que luy important extrémement d’vnir la Famille des Tarquins auec la ſienne, la Politique vouloit, ce que la Vertu & la Iuſtice ne vouloient pas. De ſorte que s’accommodant au temps, ce terrible Mariage ſe fit auec magnificence : car le Roy ſçauoit bien que Tarquin tout meſchant qu’il eſtoit, auoit aquis beaucoup de credit, & dans le Senat, & parmy le Peuple. Ce n’eſt pas, comme ie l’ay deſia dit, que le crime de Tarquin & de Tullie n’euſt fait hor-