Page:Madeleine de Scudéry - Clélie, histoire romaine - Volume 02.pdf/321

deux de ſes voiles attachez enſemble : afin qu’il n’y euſt nulles marques de mort violente, & qu’il paruſt auoir eſté ſuffoqué par vne fluxion. Quoy qu’il en ſoit ce Prince mourut la meſme nuit que la Princeſſe qu’il aimoit : ce qui fit vn ſi grand bruit dans Rome, que l’on n’y parloit d’autre choſe. Tarquin & Tullie eſtoient pourtant ſi redoutables à tout le monde, qu’on ne ſe diſoit qu’à l’oreille ce que l’on penſoit de ces deux morts arriuées en meſme temps : & dont la cauſe eſtoit ſi peu apparente, qu’on ne donnoit point de nom à la maladie qui auoit fait mourir ces deux illuſtres Perſonnes. Ce Cruel & cette Barbare auoient bien preueû que les faiſant mourir en meſme temps, on en penſeroit ce qu’on en penſa : mais ils auoient bien veû plus de danger pour eux à les faire mourir ſeparément : car ſi la Prin-