Page:Madeleine de Scudéry - Clélie, histoire romaine - Volume 02.pdf/311

d’Ameriole & elle auoient-ils expliqué trop criminellement les Lettres qu’ils auoient veuës, ou que Tarquin ſe repentant reuiendroit peut-eſtre à la raiſon. De ſorte que ſe contraignant autant qu’elle pût, elle fit ſemblant de taſcher de deuiner de qui pouuoit eſtre ce Billet qu’il ne vouloit pas luy montrer, quoy qu’elle ne ſçeuſt qui luy nommer, car elle ne luy vouloit pas dire le nom du Prince ſon Frere & Tullie n’auoit pas accouſtumé de luy eſcrire. Mais enfin apres que cét enioüement forcé eut duré quelque temps, on ſeruit, & Tarquin pour auoir le plaiſir de voir de ſes propres yeux prendre le Poiſon à cette admirable Perſonne, voulut manger auec elle. I’ay oüy dire à vn homme qui la vit alors, que quoy qu’elle fuſt melancolique, elle n’auoit iamais eſté plus belle qu’elle eſtoit ce ſoir là. Auſſi aſſure-t’on que