Page:Madeleine de Scudéry - Clélie, histoire romaine - Volume 02.pdf/306

deſia remarquée, s’en retourna diligemment chez luy, pour enuoyer du Poiſon à Tullie, & pour en donner à ſa Femme. Mais par malheur pour cette vertueuſe Princeſſe, ce Tyran arriua deuant qu’elle pûſt eſtre aduertie par celle qui auoit entendu la conuerſation de Tullie & de luy : & il arriua meſme ſi iuſte pour l’empeſcher, que l’Eſclaue qui eſtoit chargé du Billet qui euſt pû luy ſauuer la vie ſi elle l’euſt reçeu, parloit à vne de ſes Femmes lors qu’il paſſa dans vne Anti-chambre où ils eſtoient. Mais le mal fut qu’il y paſſa precidément comme cét Eſclaue qui auoit ce Billet à la main, refuſait de le donner à celle à qui il parloit : diſant qu’il auoit ordre de ne le donner qu’à la Princeſſe. Cependant comme Tarquin s’eſtoit deſrobé de la Chaſſe, & qu’il n’auoit qu’vn des ſiens aueque luy, il eſtoit entré ſans bruit, & ſans