Page:Madeleine de Scudéry - Clélie, histoire romaine - Volume 02.pdf/303

par la mort de ſon Frere : & que cette mort ne l’a pas empeſché d’eſtre mis par le Peuple au rang des Dieux. Penſez encore que ceux qui font vne longue Guerre pour regner, immolent bien plus de victimes innocentes que vous n’en immolerez : & ſouuenez vous ſur toutes choſes que Tullie ſera à vous, dés que les ennemis de noſtre bonheur ne ſeront plus. Car genereux Artemidore, il faut que vous ſçachiez, qu’encore que Tullie ne fuſt capable d’aucun ſcrupule, ny d’aucun ſentiment de Religion, ny de vertu, elle n’auoit pourtant iamais promis ſa poſſeſſion à Tarquin, que lors qu’il ſe ſeroit mis en eſtat de l’eſpouſer : car elle craignoit que ſi elle contentoit ſon amour, il ne cherchaſt d’autres voyes de contenter ſon ambition, & que la ſienne ne fuſt pas ſatiſfaite : c’eſt pour quoy voulant que la paſſion de ce Prince luy ſer-