Page:Madeleine de Scudéry - Clélie, histoire romaine - Volume 02.pdf/302

reparer cette faute par vne diligence extréme : c’eſt pour quoy ſans balancer dauantage il faut empoiſonner auiourd’huy les deux Perſonnes qui empeſchent noſtre bonheur. Il y a longtemps que nous l’auons reſolu : & leur perte eſt ſi neceſſaire à noſtre repos, & meſme à la grandeur de Rome, qu’il y a de la iuſtice à les perdre. Executez dont la choſe de voſtre coſté, comme ie l’executeray du mien : n’ayez pas la foibleſſe de vous repentir, & gardez que vos yeux ne deſcouurent le ſecret de voſtre ame. Prenez garde vous meſme, reprit la meſchante & fiere Tullie, que les beaux yeux de voſtre Femme de vous changent le cœur : & ſans vous ſouuenir en cette occaſion ny des Dieux, ny des hommes, ny de Loix, ne vous ſouuenez que de la Couronne où vous pretendez. Penſez, dis-ie, que Romulus aſſura le Throſne