Page:Madeleine de Scudéry - Clélie, histoire romaine - Volume 02.pdf/301

auec la Princeſſe ſa Femme. Si bien que ſuiuant l’impetuoſité de ſon naturel, il creût qu’ils ne ſongeoient qu’à choiſir le poiſon qu’ils luy vouloient donner. Eſtant donc dans ce ſentiment, il entra dans la Chambre de Tullie : à qui il dit que ſa derniere Lettre auoit eſté ouuerte, & luy demanda à voir celle qu’elle auoit reçeuë de luy. En effet cette cruelle Perſonne l’ayant regardée attentiuement auec Tarquin, ils virent effectiuement que cette Lettre auoit eſté cachetée auec vn Cachet contrefait : mais à peine l’eurent-ils veû, que Tullie prenant la parole ; & bien, luy dit-elle, n’auois-ie pas raiſon de dire que vous alliez vn peu trop lentement, & qu’il falloit nous haſter de nous deffaire de tous les obſtacles qui s’oppoſent à noſtre bonheur ? Ouy ma chere Tullie, luy dit-il, vous auiez raiſon, & i’ay eu tort : mais il faut