Page:Madeleine de Scudéry - Clélie, histoire romaine - Volume 02.pdf/30

ment afin de voir ſi en changeant de lieu il ne changeroit point de ſentimens, & s’il ne recouureroit point le repos qu’il auoit perdu. Mais comme il luy euſt eſté difficile de dire adieu à ſon Riual, d’vne maniere dont ſa vertu euſt eſté ſatiſfaite, il ouurit ſon cœur à Celere : qui eſtant bien aiſe que deux ſi grands Princes ne ſe broüillaſſent point, aprouua l’intention qu’il auoit de partir ſans voir Aronce : qui ſe voyant ſur le point d’aller à Perouſe, ſe trouuoit dans vn aſſez grand embarras. Car comme il ne ſçauoit où eſtoit Clelie, il euſt volontiers ſouhaité, quoy que la veuë d’vn Riual ne ſoit pas agreable, que le Prince de Numidie y euſt eſté auſſi bien que luy : mais il ne fut pas à la peine de luy faire cette propoſition : parce qu’Aderbal fut trouuer le meſme ſoir Sicanus & Aurelie, pour leur dire adieu, &