Page:Madeleine de Scudéry - Clélie, histoire romaine - Volume 02.pdf/298

douleur d’apprendre que i’aye eu vn Frere qui vous ait oſté la vie. Apres cela ces deux vertueuſes Perſonnes ſe dirent encore des choſes infiniment tendres ; & depuis qu’il eſt des malheureux, il n’y en a iamais eu dont les ſentimens ayent eſté ſi heroïques, ſi paſſionnez, & ſi innocents tout enſemble. Ils reſolurent pourtant en ſe ſeparant de s’aduertir de ce qu’ils deſcouuriroient : apres quoy le Prince d’Ameriole s’en alla chez le Roy, mais auec vne melancolie ſi profonde, qu’il luy eſtoit impoſſible de la cacher : auſſi fut elle remarquée de tout le monde, & meſme du Roy. Pour la Princeſſe elle ſe mit à prier les Dieux apres que le Prince d’Ameriole fut party, & à les prier meſme & pour Tarquin, & pour Tullie : puis qu’au lieu de leur demander leur perte pour empeſcher la ſienne, elle leur demandoit ſeule-