Page:Madeleine de Scudéry - Clélie, histoire romaine - Volume 02.pdf/296

nous ſommes en ſeureté. Car Tarquin demande à Tullie le iour qu’elle deſtine à nous faire perir : de ſorte que dés que vous verrez qu’elle l’aura choiſi, nous prendrons garde à nous : & comme il eſt permis de deffendre ſa vie, ie ſouffriray alors que vous faciez tout ce qui pourra aſſurer la noſtre. Mais iuſques à ce que cela ſoit, ie ne puis ſouffrir que l’on ait recours à nuls remedes violens : car i’aime bien mieux perir par imprudence, & par excés de bonté, que ſi ie faiſois perir les autres iniuſtement, par trop de precipitation. Mais Madame, reprit-il, peut-il y auoit de l’iniuſtice à s’empeſcher de mourir ? Quoy qu’il en ſoit, repliqua-t’elle, la mort ne me fait pas tant de peur que ie veüille pour l’eſuiter me mettre en hazard qu’on puiſſe dire que i’aye perdu mon Mary : & i’aime beaucoup mieux qu’on reproche eter-