Page:Madeleine de Scudéry - Clélie, histoire romaine - Volume 02.pdf/295

vous ne voulez rien de ce que ie vous propoſe, il faut du moins que vous enduriez que i’aille trouuer le Roy à l’heure meſme, pour luy dire ce que ie ſçay : & que ſur quelque pretexte qui n’eſt pourtant pas aiſé à trouuer, vous ne mangiez point chez vous, & n’y couchiez pas : car ie ne ſçay ſi c’eſt par le Fer ou par le Poiſon que l’inhumaine Tullie, & le cruel Tarquin, vous veulent faire perir. Mais ſi vous allez trouuer le roy, repliqua-t’elle, ſans luy pouuoir prouuer ce que vous auancerez, vous ferez vn grand eſclat qui auancera peut-eſtre noſtre perte au lieu de l’empeſcher : c’eſt pourquoy ſi vous m’en croyez, ayez patience : peut-eſtre que ceux qui veulent noſtre mort ſe repentiront : & puis que l’Eſclaue qui porte leurs lettres eſt à vous ; que vous auez vn Cachet comme le leur ; & que vous pouuez voir tout ce qu’ils s’eſcriuent,