Page:Madeleine de Scudéry - Clélie, histoire romaine - Volume 02.pdf/294

faut taſcher de faire voir au Roy vne Lettre effectiue de Tarquin à Tullie : ou de Tullie à Tarquin : afin qu’apres cela par ſa prudence, & par ſon authorité, il nous mette à couuert de ces deux dangereuſes Perſonnes. Il pourra eſtre qu’il trouuera à propos de me mettre en lieu ſeur durant quelque temps, ſur quelque pretexte qu’il inuentera, & qu’il vous commandera d’aller faire quelque voyage, iuſques à ce que la raiſon ait repris ſa place dans l’eſprit de nos ennemis ; ou qu’il ait trouué les moyens de s’en aſſurer. Mais Madame, repliqua ce Prince, durant que nous chercherons les voyes de faire voir au Roy ces Lettres dont vous parlez, vous perirez infailliblement : & puis pour ne vous tromper pas, il ne faut point que vous croiyez que ie puiſſe m’eſloigner de vous en l’eſtat où ſont les choſes ; ainſi Madame, ſi