Page:Madeleine de Scudéry - Clélie, histoire romaine - Volume 02.pdf/293

pour moy : car ie ſens bien que mon amour ſera tellement aſſuietie à ma raiſon, & à voſtre vertu, qu’elle ne me fera iamais rien faire qui vous faſche, ny rien dire qui vous deſplaiſe. Conſentez donc Madame, à ce bien heureux exil, ſi vous ne voulez pas conſentir à la perte de Tarquin, & à celle de Tullie. Non non genereux Prince, luy dit-elle, ie ne conſentiray ny à l’vn ny à l’autre : car ſi ie m’en allois comme vous le propoſez, ie ſauuerois ſans doute ma vie : mais puis que ie ne le pourrois faire ſans expoſer ma reputation, il n’en faut pas auoir la moindre penſée : car que ne diroit point l'iniuſte Tarquin, & que ne publieroit pas la cruelle Tullie ? Perdons les donc Madame, reprit le Prince d’Ameriole, puis que ie ne ſçaurois ſouffrir qu’ils vous perdent. Pour prendre vn milieu entre de ſi fâcheuſes extremitez, reprit-elle, ie croy qu’il