Page:Madeleine de Scudéry - Clélie, histoire romaine - Volume 02.pdf/289

ie die dans le trouble où ie ſuis ? car enfin ie ſuis ſi eſpouuantée du crime de Tarquin, & de celuy de Tullie, que ſi ie ne ſçauois que vous eſtes le plus ſincere, & le plus vertueux de tous les hommes, ie ne pourrois croire ce que ie voy. En effet, le moyen de conceuoir que le cœur de deux Perſones d’vne naiſſance ſi illuſtre, puiſſe eſtre capable de ſentimens ſi noirs, ſi laſches, & ſi criminels ? le moyen que l’amour puiſſe inſpirer des deſſeins de cette nature ? le moyen, dis-ie, que l’amour ſubſiſte auec vne paſſion auſſi tumultueuſe que l’ambition ? le moyen que la Fille de Seruius Tullus, qui eſt le plus vertueux Roy du monde, veüille renuerſer ſon Pere du Throſne, & faire mourir ſa Sœur & ſon Mary ? & le moyen que le Frere du Prince d’Ameriole, puiſſe eſtre capable de vouloir ſa mort, & la mienne ? Helas