Page:Madeleine de Scudéry - Clélie, histoire romaine - Volume 02.pdf/288

pas m’eſtablir iuge de leur crime, quoy que Tullie ſoit la plus perfide Femme du monde : & que Tarquin ſoit auſſi le plus laſche & le plus ingrat Frere de la Terre. Parlez donc Madame, ie vous en coniure : & ſouuenez vous qu’il s’agit de ſonger à voſtre conſeruation : car pour mon intereſt, ie ne le conſidere point en cette rencontre : & s’il y auoit vne voye de ſauuer voſtre vie en expoſant la mienne à mille dangers au lieu d’vn, il la faudroit prendre preferablement à toute autre. En effet puis que ie ne puis iamais vous poſſeder, la mort me ſeroit plus douce que la vie : & ie ne pourrois mourir plus glorieuſement qu’en mourant pour voſtre ſeruice. Parlez donc Madame, encore vne fois : car les momens ſont precieux, en vne occaſion ſi preſſante. Helas genereux Prince, repliqua-t’elle, que voulez vous que