Page:Madeleine de Scudéry - Clélie, histoire romaine - Volume 02.pdf/275

ils diſoient qu’il y auoit bien de la follie aux hommes : qui rompent quelqueſfois leurs plus glorieux deſſeins par des ſcrupules de vertu, ou par vne imagination mal fondée d’vne gloire chimerique : qui ne s’eſtabliſſoit que par des actions d’vne generoſité incommode, qui eſtoit abſolument incompatible auec l’execution de toutes les grandes entrepriſes. Pour moy (diſoit vn iour Tarquin à Tullie comme on l’a ſçeu depuis par vne Fille d’eſprit qui eſtoit à cette Princeſſe) ie poſe pour vne verité indubitable, que quiconque voudra s’enfermer dans les bornes que le vulgaire donne à la iuſtice, & à la generoſité, ne fera iamais rien de Grand du coſté de la Fortune : & que ſi on n’auoit iamais violé de Loix, il n’y auroit iamais eu d’hommes qui ſe fuſſent mis ſur la teſte des autres : & qu’il n’y auroit en tout l’Vniuers,