Page:Madeleine de Scudéry - Clélie, histoire romaine - Volume 02.pdf/270

Tullie : car il n’y a iamais eu deux eſprits plus ennemis de toute eſgalité que ces deux là. En effet ce qui leur eſtoit le plus inſuportable, eſtoit de voir que le Roy ne ſe déterminoit point à en fauoriſer vn plus que l’autre : cependant dés qu’ils eurent remarqué l’intention de Seruius Tullus, ils ne donnerent aucun repos aux deux Perſonnes à qui la Fortune les auoit attachées : car Tullie perſecutoit continuellement le Prince d’Ameriole, afin qu’il entrepriſt plus qu’il ne faiſoit, & contre le Roy, & contre Tarquin : & Tarquin ne laiſſoit aucun repos à la Princeſſe ſa Femme, afin de l’obliger à tirer auantage de la tendreſſe qu’il ſçauoit que le Roy ſon Pere auoit pour elle : & à la vouloir forcer d’agir contre le Prince d’Ameriole. De ſorte que par ce moyen, Tarquin agiſſoit continuellement contre ſon Frere & contre ſa Mai-