Page:Madeleine de Scudéry - Clélie, histoire romaine - Volume 02.pdf/265

contraire voyant qu’elle auoit encore quelque part en l’affection de Tarquin, elle luy dit tout ce qui pouuoit flatter & ſon amour & ſon ambition : mais comme elle ne luy pouuoit pas faire voir qu’il luy fuſt plus auantageux de l’eſpouſer, que d’eſpouſer la Princeſſe ſa Sœur, elle ne luy fit pas changer de ſentimens. De ſorte que cette abominable Perſonne voyant qu’elle ne pouuoit eſtre ſa Femme, & preuoyant qu’il auroit peut-eſtre vn iour toute l’authorité, elle ne luy oſta pas l’eſperance d’eſtre encore ſa Maiſtreſſe, quand il auroit eſpouſé ſa Sœur, & qu’elle auroit eſpouſé ſon Frere. Ce n’eſt pas qu’encore qu’elle aimaſt Tarquin, elle n’euſt alors deſſein de taſcher de mettre la faueur en la Perſonne de celuy qu’elle deuoit eſpouſer, afin que Tarquin deſpendiſt d’elle, & qu’elle ne deſpendiſt pas de luy : mais