meſme s’eſt donnée à vous ? ouy Seigneur, reprit-il, & c’eſt ce qui me rend encore plus miſerable. Mais vous ſçauez donc que vous eſtes Romain, reprit Aderbal ; car quand elle eſtoit à Carthage, Clelius ne la vouloit donner qu’à vn Romain : & il parloit comme vn homme qui l’auroit refuſée à tous les Rois de la Terre, pour la donner à vn ſimple Citoyen de Rome. Il eſt vray, repliqua Aronce, que la choſe eſtoit ainſi quand nous eſtions à Carthage : mais il eſt vray auſſi que quoy que ie ne ſois pas Romain, ie n’ay pas laiſſé d’eſtre en eſtat de me voir heureux, ſi la Fortune l’euſt voulu. Apres ce que vous venez de m’aprendre, repliqua Aderbal, ie ſçay bien ce que ie deurois vous dire : mais à vous parler ſincerement Aronce, ie ne ſçay ſi ie vous le diray : & ie me trouue ſi malheureux de trouuer mon Riual en la perſonne de mon Amy, & d’aprendre que
Page:Madeleine de Scudéry - Clélie, histoire romaine - Volume 02.pdf/26
Le texte de cette page a été corrigé et est conforme au fac-similé.
