de la Perſonne que l’on aime. Puis que ie n’en ay pas pour moy meſme, repliqua la Princeſſe, vous ſeriez iniuſte de murmurer de ce que ie n’en ay pas pour vous : mais encore vne fois Madame, luy dit-il, conſiderez quel embarras va eſtre le noſtre. Si ie fais ce que vous voulez, i’eſpouſeray Tullie que ie n’aime point, & qui ne m’aime pas, & ie continuëray de vous aimer : Tarquin vous eſpouſera, en continuant d’aimer Tullie : & il pourra meſme arriuer que vous m’aimerez plus que vous ne faites, & que ie contribuëray à voſtre infortune : car ie ne tiens pas poſſible, que vous me puiſſiez voir auſſi malheureux que ie le ſeray, ſans en auoir le cœur touché de quelque compaſſion. Songez donc bien Madame, à tout ce que ie vous dis : & apres cela faites moy la grace de me dire ce que vous voulez que ie
Page:Madeleine de Scudéry - Clélie, histoire romaine - Volume 02.pdf/259
Cette page n’a pas encore été corrigée