Page:Madeleine de Scudéry - Clélie, histoire romaine - Volume 02.pdf/258

Ie croy ſans doute tout ce que vous me dittes, luy repliqua la Princeſſe, mais ie le croy ſans y pouuoir trouuer de remede : car l’honneur ne me permet pas de m’en aller aueque vous chercher vn Aſile en Grece : & la ſeule tendreſſe que i’ay pour le Roy & pour la Reine, m’empeſcheroit d’y pouuoir conſentir, quand meſme vn ſentiment de gloire ne m’en empeſcheroit point. Ie croy meſme eſtre obligée de vous conſeiller d’eſpouſer ma ſœur, pourſuiuit-elle, parce que ie ſuis perſuadée qu’elle a beſoin de voſtre vertu, pour retenir vne partie de ſon ambition : & pour l’empeſcher de rien entreprendre d’iniuſte. Ha Madame, luy dit alors le Prince d’Ameriole, ie voy bien que ie m’eſtois trompé, lors que i’auois creû que ie n’eſtois pas haï de vous : car quand on a vne affection tendre, on ne peut auoir tant de ſageſſe : & l’on a vn peu plus de compaſſion des maux