Page:Madeleine de Scudéry - Clélie, histoire romaine - Volume 02.pdf/257

ſçachant bien que ie ne l’aimeray iamais, & que ie vous aimeray toute ma vie, ie ſerois iniuſte de le trouuer mauuais. Mais ie vous prie ſeulement de conſiderer que le Roy voulant auſſi fortement que i’eſpouſe Tullie, qu’il veut que vous eſpouſiez Tarquin, & que le voulant pour les meſmes intereſts ; ie ne ſçay quelle reſolution prendre. Si ie refuſe l’honneur qu’il me veut faire de me donner ſa Fille, il faut que ie ſorte de Rome, & que ie ne vous voye iamais : & ſi ie veux demeurer aupres de vous, il faut que i’eſpouſe vne Perſonne qui me haït, & que ie n’aime pas : & que ie vous voye en la poſſeſſion de mon Frere, qui ne s’eſtimera pas meſme heureux de vous poſſeder. Iugez apres cela Madame, ſi i’ay tort de vous coniurer de faire quelque reflection ſur des choſes qui peuuent auoir des ſuites ſi fâcheuſes.