Page:Madeleine de Scudéry - Clélie, histoire romaine - Volume 02.pdf/250

nouuelle qui ne leur laiſſa nul eſpoir, la melancolie s’ampara ſi fort de leur eſprit, qu’ils n’eſtoient pas connoiſſables : ils ſe contraignoient pourtant autant qu’ils pouuoient, & ne laiſſoient pas de faire les meſmes choſes qu’ils auoient accouſtumé de faire. En effet comme les Princeſſes s’alloient preſques tous les ſoirs promener à vn grand Iardin qui eſtoit au Palais que Seruius Tullus faiſoit baſtir au Mont Palatin, parce qu’il ne ſe trouuoit pas aſſez bien logé à celuy qu’il auoit fait faire au Mont Eſquilin, il arriua qu’y eſtant allées ſuiuant leur couſtume, & les deux Princes qui les deuoient eſpouſer y eſtant venus, le hazard diſpoſa les choſes d’vne façon que Tarquin ſe trouua engagé à parler auec Tullie : car comme il la connoiſſoit pour eſtre tres ambitieuſe, quoy qu’il ne la vouluſt pas eſpouſer, & quoy qu’il euſt