Page:Madeleine de Scudéry - Clélie, histoire romaine - Volume 02.pdf/247

Prince, il n’eſt rien de ſi violent qu’il n’en faluſt attendre : & ie ſuis perſuadé qu’à moins que de les faire monter au Throſne en les mariant, il y auroit de la folie à faire ce Mariage : car ils ont tous deux l’eſprit ambitieux, ils l’ont violent, hardy, & peu ſcrupuleux : mais en les ſeparant ie les mets peu-eſtre en eſtat de ſe pouuoir corriger, ou du moins de ne pouuoir rien faire qui me puiſſe nuire en effet en donnant à l’ambitieux Tarquin, vne Perſonne qui n’a nulle ambition, qui eſt belle, qui eſt douce, qui a de la vertu, qui m’aime, & qui craint les Dieux, il eſt croyable qu’elle adoucira la fierté de ſon temperamment, & qu’elle l’empeſchera de rien entreprendre d’iniuſte : & il eſt auſſi vray-ſemblable qu’en donnant pour mary à l’ambitieuſe Tullie, vn Prince qui eſt beau, bien fait, genereux, & incapable d’vne